BACNOTAN, LA UNION – Bimmisita idiay ili ti Bacnotan, La Union dagiti sumagmamano a kameng ti Philippine Sports Commission (PSC) ken nangidaulo ti courtesy call iti opisina ni Mayor Divine Fontanilla idi kalman, Abril 19, 2026.
Indauloan ni PSC Sports Facilities Management Division Chief Julia Dhole Llanto iti delegasion. Iti panagbisitada, ginundawayan ti grupo a personal a makita iti agtultuloy a “Laro’t Saya sa Bacnotan Program” nga maisaysayangkat kabinnulig iti lokal a gobierno.
Impakaammo ni Mayor Fontanilla ti napalaos a panagyamanna iti PSC gapu iti agtultuloy a suporta ken tulong iti ili, nangruna iti panangpabileg ti grassroots sports development program ti Bacnotan.
Timmabuno met iti miting dagiti opisial a da Marc Jandel Buccat, Bacnotan Youth Development Officer, ken Champ Cargamento, Bacnotan Sports Program Coordinator.
Kabayatanna, al-allukuyen ti lokal a gobierno iti publiko a makipaset kadagiti aktibidad ti Laro’t Saya Program a maisaysayangkat tunggal Sabado ken Domingo manipud alas-siete ti bigat agingga alas-nuebe ti bigat.
Karaman kadagiti aktibidad a mabalin a pagpasetan ket ti futsal, table tennis, chess, running, archery, volleyball, dance sports, ken zumba. Maang-angay dagitoy iti nadumaduma a training sites a kas iti Bacnotan Farmers’ Park and Civic Center, Bacnotan Sports Complex, Bacnotan National High School, ken Bacnotan Central School.
Agtultuloy met ti LGU Bacnotan, babaen ti panangidadauloda Mayor Divine Fontanilla ken Vice Mayor Francis Fontanilla, iti panangipatungpal kadagiti programa a mangpabileg iti pannakipartisipar ti komunidad iti tay-ak ti sports. (Report by Bombo Jordan)
Courtesy: Bacnotan, La Union (FB)
