LA UNION – Nagbalin a naannayas iti pannakaiturong ti bangkay ni Judge Mario Anacleto Bañez iti auditorium idiay Tagudin, Ilocos Sur.
Agarop alas 2:15 itay malem a simmangpet iti bangkay ni Judge Bañez idiay Tagudin babaen iti panangbayabay ti pamilya daytoy ken naduma-duma a unit ti pulisiya.
Kabayatanna, saan a nagbalin a lapped iti napigsa a tudo iti panangsabat dagiti katrabahuan, gagayyem, empleyado ken opisyal ti lokal a gobyerno, agraman dagiti estudyante iti pannakaisangpet ti bangkay iti auditorium.
Napunno ti ladingit dagiti tattao a nangpasangbay ti bangkay iti kuna da a simple ken nasingpet nga ukom.
Iti public viewing ti bangkay ni Judge Bañez idiay Tagudin auditorium ket agpatingga laeng inton bigat.
Agarop alas 8:00 inton bigat ket maisubli met laeng ti bangkay ditoy syudad ti San Fernando para iti pannakalamay na iti mismo a pagtaengan da idiay Barangay Dallangayan Oeste.
Kabayatanna, siniguro ni PBGen. Joel Orduña ti PRO-1, iti napaspas nga imbestigasyon iti kaso ni Bañez.
Daytoy ket nupay inikkan na ti naan-anay a gundaway ni P/Col Jay Cumigad, PD iti LUPPO, tapno makakalap iti kanayunan nga ebidensiya para iti posible a pannakasolbar iti kaso.
Maladingitan ni Orduña iti napasamak a krimen isunga nainget a kondinaren da dagiti agar-aramid iti kriminalidad.
