LA UNION – Naserreken iti sakit nga African Swine Fever (ASF) iti ili a Pugo, La Union.
Kinumpirma iti Bombo Radyo La Union ni Municipal Agriculturist Leticia Paculan ken iti Provincial Veterinary Office (PVet), a pakabuklan a 207 a baboy iti naipasidong iti culling.
Immuna ti daytoy, naireport iti opisina ni Paculan iti panaglaladot ken pannakatay dagiti baboy a taraken dagiti hog raisers.
Idi July 16, naalaan ti blood sampling dagiti 5 a baboy ket naduktalan a positibo amin dagitoy iti ASF.
Gaputi dayta, dagus a naipasidong iti culling babaen iti LGU-Pugo ken Dept. of Agriculture dagiti 207 a baboy idi napan a lawas manipud iti ground zero agingga iti 500 meter radius.
Naikali dagiti baboy, a kaadwan ket takong ken growers, iti kauneg nga 8-12 feet.
Aganay 29 hog raisers iti apektado ita ti pagbiagan da gaputi panagraira ti sakit nga ASF iti nasao nga ili.
Idi July 17, nangipaulog a dagus ti lokal a gobiyerno iti advisory, a mangipawil iti pannakairuar ken panagserrek iti dingwen a baboy, naparti a karne ti baboy, ken dadduma pay a pork related products, tapno ma-contain iti panagwaras ti nasao a sakit.
Kabayatanna, naipanamnama met kadagiti backyard hog raisers iti maipaay nga ayuda kadakuada.
Malaksid iti Pugo, immun-unan a nakailista iti kaso ti ASF idiay ili ti Agoo, Sto Tomas, Sudipen, ken syudad ti San Fernando.
