LA UNION – Nagpalawag iti estasyon ti Bombo Radyo La Union ti pulis nga immuna a naaresto iti uneg ti police station mainaig kadagiti pammabasol kenkuana isu a sumangsango daytoy iti agtutuon a kaso.
Iti pannakiuman ti Bombo Radyo kenni Cpl. Leo Montemayor, nakadistino iti Police Aviation Security Group ken residente iti Aringay, La Union, kinunana a bin-ing nga awan ti kinapudno dagiti impabasol kenkuana ti Aringay Police nga idadaulwan ni Capt. Gerardo Macaraeg.
Sigun kenni Montemayor, immuna isuna nga inimbetaran dagiti opisyal iti police station para koma iti komprontasyon kadagiti lima a contraction workers a maipagarup a nangbastos iti kadindinnana ti pagtaengan a ni Caroline Bautista.
Naglibakan ti nasao a pulis iti alegasyon kenkuana a bunutbutengna dagiti construction workers ken addaan pay daytoy iti imet a paltog.
Saan met kinunana a pudno dagiti nakalanad iti naidatag a reklamo ti Aringay Police kontra kenkuana a nagbalin nga arogante daytoy kadagiti padana a pulis kabayatan nga adda iti uneg ti police station.
Impaganetget pay ni Montemayor nga adda ti maiyanatop a dokumento ti paltog a kinumpiskarda kenkuana.
Kabayatanna, mangnamnama ni Montemayor nga ibasura ti piskalya dagiti naidatag a reklamo kontra kenkuana gapu ta lehitimo iti iggemna a dokumenton para ti nasao a paltog.
Uray ti sangsanguenna a kaso nga administratibo a naipila idiay National Police Commission ket namnamaenna met a maibasura ti kamauddianan.
Maipagarup a nangrugi iti amin idi a komprontaren ti pulis dagiti lima a lallaki a nangserrek ti pagtaenganda kasaruno iti panangbastos ti kabbalayna.
Iti met panangipalawag ni Caroline, maipagarup a rinaot isuna dagiti nasao a lallaki kasaruno iti panangabuso kenkuana kabayatan nga adda daytoy iti uneg ti balay.
Iti agdama, sinampaan metten ni Caroline iti kaso dagiti lima a construction workers ti acts of lasciviousness idiay prosecutor’s office.
