LA UNION – Maisagsaganan ti agtutuon a kaso kontra iti pulis a nangpaltog iti maysa a baro idiay videoke bar idiay Barangay Bulala, ili ti Bacnotan, La Union.
Nabigbig ti nasao a pulis a ni Patrolman Alvin John Eleazar, 30, residente iti ili ti Binalonan, Pangasinan ken naka-assign iti 2nd La Union Police Mobile Force Company.
Naammuan ti Bombo Radyo manipud iti Bacnotan Police, maipagarupo a ginandat ti nasao a pulis nga anawaen ti padana a kustomer wenno ti biktima a ni Aldrin Gaudia a makirikrikyar iti anak ti manager iti bar.
Ngem maipagarup a saan a nangipangag ti biktima ken iti kakadduana a nanggandat a labananda ni Eleazar.
Pinaputukan ti pulis ni Gaudia ken dua a daras daytoy a napungtaan iti bala ti bagi.
Maipagarup a ginandat met ni Eleazar iti naglibas ngem natiliw met laeng daytoy babaen kadagiti padana a pannakabagi ti linteg.
Nakompiskar manipud iti suspek ti maysa a cal .45 a paltog a maatap a naaramat kontra iti biktima.
Agpapaimbag itan idiay ospital ti biktima.
Naammuan nga agpada a nakainom iti arak dagiti dua idi a napasamak ti pammaltog.
Kabayatanna, impaganetget ti pulis a ‘self defense’ iti panagpaputokna iti paltog gapu ta maipagarup a naggandat ti biktima ken dagiti kakaddua daytoy a dangran isuna.
