Maysa a karambola dagiti lugan ti napasamak iti kawatiwatan ti National Highway idiay Barangay Santiago, Bauang, La Union.
Ti nasao nga aksidente ket pakairamanan ti maysa a puraw nga Honda BR-V a minaneho ni Maricris Merrera Madarang, 52-anyos, addaan asawa, maysa nga empleyado ti gobierno, residente ti Barangay Malindong, Binmaley, Pangasinan;
maysa a black Yamaha NMAX a minaneho met ni Patrolman Ramil Caoile Pascua, 30-anyos, awanan asawa, miembor ti PNP a nakadestino idiay Regional Special Training Unit 1, residente ti Barangay Batao-batao, Santa Barbara, Pangasinan;
ken ti maysa a pampasahero a bus a minaneho ni Mr. Niño Eisma Engañom 43-anyos, addaan asawa, maysa a bus driver, ken residente ti 33 Malabago, Santo Tomas, La Union.
Segun iti imbestigasyon ti Bauang Municipal Police Station, agpapada nga agpa-Amianan a direksyon dagiti biktima. Iti Honda BR-V ket sinaruno ti Yamaha NMAX ken maud-udi met iti pampasahero a bus.
Nangrugi iti insidente iti panangliklik ti Honda BR-V iti abot ti kalsada. Kellaat daitoy a nagpreno a rason met tapno madungpar isuna ti Yamaha NMAX a sumarsaruno kenkuana. Naipurwak ti driver iti northbound outer lane ken nagasat a ti motor na laeng ti nadungpar iti sumungsungad a pampasahero a bus.
Kas resulta ket naiturong ti driver ti Yamaha NMAX idiay Ilocos Training, Regional and Medical Center ditoy ciudad ti San Fernando para iti medikal a pannakataming bayat a saan met a naan-ano iti driver ti kotse ken bus.
Segun kadagiti otoridad, agparparang a ti rason ti aksidente ket HUMAN ERROR gapo iti “sudden stop” wenno kellat a panagpreno iti driver ti Honda BR-V.
