Agtultuloy iti palagip dagiti otoridad iti publiko a liklikan iti panagusar ti maiparit a paputok, dua nga aldaw sakbay iti Baro a Tawen tapno masigurado a natalged iti tunggal-maysa.
Panggep ti kampania a malapdan dagiti aksidente a patauden ti nakaro a pannakadangran wenno pannakapukaw ti biag.
Agtultuloy met nga ilunglungalong dagiti otoridad iti panagusar ti alternatibo a pammauni kas iti torotot kadagiti ubbing.
Segun kenni Marie Gallardo, aglaklako ti torotot idiay San Fernando Public Market, bimmaba iti panaglakuanda maiyarig iti napalabas a tawen.
Maysa kadagiti kangrunaan a makagapu ket iti kinaawan ti baro a disenio kadagiti torotot nga ang-angkaten-da.
Arigna saan unay a makaallukoy kadagiti gumatgatang iti simple a langa dagiti torotot.
Nupay kasta, agtaltalinaed a mangnamnama dagiti negosyante a dumakkel iti mapaglakuanda kadagiti maudi nga aldaw ti tawen.#
