LA UNION – Nagpalawag ni Punong Barangay Gemma de Guzman maipapan ti wagas iti panangbingay kadagiti relief goods a naited kadagiti stranded a boarders idiay Barangay Carlatan, syudad ti San Fernando, La Union gapu ti agraraira nga enhance community quarantine.
Iti pannakiuman ti Bombo Radyo kenni de Guzman, kinunana a nagtungpalda laeng iti bilin manipud iti lokal a gobyerno ti syudad tapno maiwaras dagiti available wenno adda a relief goods kadagiti agab-abang a saan a nakaawid iti bukodda a lugar.
Sigun ti Punong Barangay, iti inaramidda a wagas ket tapno maikkan iti amin a boarders ti tulong a nagtaod iti gobyerno.
No man pay adda dagiti nakadillaw maipapan ti napisi a sabon, kinuna ti opisyal nga inaramidda daytoy a panangbingay gapu ta awan iti available a babassit a sabon a naka-sachet.
Iti kada boarder ket naikkan iti dua kilo a bagas, uppat a de-lata ken napisi a sabon.
Naminsan pay nga impaganetget ni de Guzman a nasayaat iti panggepda maipapan ti wagas a panangbingay tapno mawarasan ang agpapada dagiti agkasapulan iti tulong lalo ita a panawen ti krisis.
