LA UNION – Agladladingit ita ti pamilya ti kapitan iti Barangay Urayong, Caba, La Union kalpasan a saanna a nalasatan ti panagatake ti stroke kabayatan a maang-angay ti seminar idiay syudad ti Baguio.
Naammuan ti Bombo Radyo, maipagarup a killaat a naapukawan ti puot ti opisyal idi nga adda daytoy iti lugar ti pagtataripnongan iti padana a kapitan ti barangay.
Naiturong met iti ospital ti barangay chairman ngem napaay ti doktor a maisalakan ti biagna.
Sigun met kenni Germy Padua, anak ti nasao a kapitan, saanda a ninamnama ti napasamak a nalabit nabannog ti amada isu a naatake daytoy.
Inladawanda met ti punong barangay kas nasayaat nga ama ken responsable nga opisyal iti masakupanna a lugar.
