LA UNION – Naipasidong iti lockdown wenno Enhanced Community Quarantine iti Purok 4 bayat a Modified ECQ iti sumagmamano a paset ti Purok 3, Barangay Ilocanos Sur, San Fernando City, La Union.
Maiyannurot daytoy iti Executive Order 7-2020 nga inyetnag ti lokal a gobyerno ti syudad babaen iti rekomendasyon ti local IATF.
Iti nasao nga addang ket gapwanan iti nakita a nangato a bilang dagiti active cases iti COVID.
Epektibo ti nasao a pammilin itay alas 12:00 ti tengngat rabii (Enero 26) ken agpaut iti 14 nga aldaw.
Daytoy ket iti tarigagay a masiguro ti kinatalged dagiti umili ken maysa metten nga addang tapno saan nga agwaras iti makaakar a sakit.
Naminsan manen a nabalakadan dagiti amin a residente a suruten latta dagiti naiyetnag a minimum health standards, partikular iti panagsuot ti face mask, social distancing, ken kanayun a panagugas ti ima, tapno ad-adayu ti pannaka-akar iti deadly virus a COVID 19.
