LA UNION – Maysa pay a direktiba iti impaulog ti lokal a gobyerno idiay Rosario, La Union kas paset iti addang tapno labanan iti COVID-19.
Iti Executive Order No. 37 series of 2020 ket adda pakainaigan na iti pannakaipaserra iti sumagmamano a kalsada ti nasao nga ili, babaen iti panangipaulog ni Mayor Bellarmin Flores.
Partikular a maiparikep dagiti kalsada idiay Barangay Tay-ac, Puzon ken Tabtabungao nga agpaut inton agleppas ti Enhanced Community Quarantine (ECQ).
Naamwan a dagiti laeng behikulo a pagluganan dagiti health workers, medical products, taraon ken danum ken dadduma pay a basic necessities iti mapalubosan a sumrek ken rumwar iti nasao a lugar.
Ipatungpal daytoy dagiti kameng ti PNP ken MDRRMO babaen iti panangimando ti checkpoint.
Immunan a nangipaulog ti pammilin ti nasao a mayor, nga inton Biyernes, Abril 10 ket nakarikep amin a business establishments, kas paset iti panang-obserbar ti semana santa.
Agsubli iti operasyon dagiti pasdek negosyo inton Abril 11, 2020.
Kabayatanna, inaramid nga imbalido ni Mayor Flores iti amin a quarantine pass wenno certificate to travel nga inyisyu dagiti barangay kapitan.
Kaipapanan daytoy nga awan ti mapalubosan a makarwar iti nasao nga ili bayat nga agraraira ti ECQ a nailayon agingga Abril 30, 2020.
Base iti kauddian a datus ti Municipal Health Office ti Rosario, awan pay ti COVID positive case malaksid laeng dagiti tallo (3) a PUI ken 344 a PUM.
