LA UNION – Agtultuloy ti imbestigasyon dagiti kameng ti Bureau of Fire Protection ti ili a Bauang, La Union seknan iti napasamak a grassfire iti nagsina a lugar iti nadakamat nga ili idi rabii, May 17, partikular ti Barangay Acao ken Barangay Calumbaya.
Iti pannakiuman ti Bombo Radyo La Union kenni FO3 Jan Chris Gajete, Arson Investigator ti Bauang Fire Station, kinunana nga immuna a nakaawat da ti tawag idiay Barangay Acao iti oras alas-8:27 idi rabii maipapan ti maur-uram a a kalidaan sadiay.
Aganay maysa nga oras ti nabusbusda a nangsebseb ti nasao nga uram.
Simmaruno a nakaawatda manen ti tawag manipud Barangay Calumbaya iti oras alas-8:35 idi rabii ken immabot met iti ala 1:01 iti parbangon sakbay a nasebseban met ti uram iti kakawayanan.
Segun kenni FO3 Gajete, narigatan da a sebseban ti apoy idiay Barangay Calumbaya gapu ti kinaadayo daytoy.
Awan met ti nailista a nadangran wenno nadadael a sanikua kadagiti napasamak nga uram.
Posible a napartak a nagkayamkam ti uram gapu ti kinabara iti panawen.
