LA UNION – Nakabayogen iti blue alert status ti Regional Disaster Risk Reduction and Management Council (RDRRMC) mainaig iti panagserrek ni bagyo Ompong iti Philippine Area of Responsibility (PAR).
Iti pannakiuman ti Bombo Radyo La Union kenni Empress Jaramillo Nacor, information officer ti Office of Civil Defense (OCD) Region 1, kinunana a sakbay pay a makastrek ti bagyo ket nakitaripnongdan iti nadumaduma nga ahensya tapno pagsaganaan ti bagyo Ompong.
No pangibasaran ti direksyon a turturongen ti bagyo ket maapektaran na ti Ilocos Norte, Ilocos Sur karaman ti probinsya ti La Union ket posible nga tumama daytoy idiay Sta. Ana Cagayan inton aldaw ti Biyernes.
Segun pay kenni Dacur, posible a makapasar iti panaglayus ti sumagmamano nga lugar iti uppat a probinsya iti rehiyon gapu iti epekto ti bagyo.
Kinuna na nga adda ti koordinasyonda iti Department of Social Welfare & Development (DSWD) Region 1, Local Government Units, ken dadduma pay nga ahensya para kadagiti relief goods a maibunong.
Kabayatan na, inallukoy met ti opisyal dagiti umili a dagus nga umakar iti natalged a lugar kabayatan a saan pay nga marikna iti rungsot ti dakes a kasasaad ti panawen.
