LA UNION – Saan a nalapdan ni incumbent Barangay Chairman Concepcion Lemi iti nagbalin nga emosyonal kalpasan a nagwaras iti fake news maipapan ti panagkandidatona manen kas punong barangay ti San Francisco, syudad ti San Fernando, La Union.
Iti pannakiuman ti Bombo Radyo kenni Kapitana Lemi, kinunana a nakaro iti sakit ti nakem a marikriknana kakpasan a nagwaras idiay lugarda ti damag nga agatgatang daytoy iti botos iti kantidad a P1,000 kada botante.
Awan met kinunana iti kinapudno maipapan ti nasao a damag ken pinaglibakanna nga adda ti maysa a nangato nga opisyal ti gobyerno nga agpapaay kas back-up wenno mangmangted ti pondona para ti panagkampanya.
Sigun kenni Lemi, bin-ig a malisyoso wenno tsimis laeng ti negatibo a mapagsasaritaan maipapan kenkuana gapu ta saan met daytoy nga aggatgatang iti botos.
Innayon pay ti kandidato, ipanpannakelna a nakapagsirbi daytoy kaddua dagiti agdama nga opisyal ti barangay idiay lugarda.
