LA UNION – Saan nga apektado ti panagbalin nga insurgency-free iti rehion uno iti laksid ti napasamak nga engkwentro idiay Abra a nakaapektaran dagiti residente idiay ili ti Sta. Maria, Ilocos Sur.
Iti pannakiuman iti Bombo Radyo La Union ken ni Army Major Bryan Albano – Civil Military Operation Officer iti 501st Infantry Brigade, naideklara nga insurgency-free ti Region 1 idi laeng napan a bulan ti Marso iti daytoy a tawen.
Segun ken Albano a dagiti New People’s Army a nakirinnanget iti Philippine Army-Region I ket grupo ti Ilocos Cordillera Regional Committee, rason no apay naipamaysa ti atensyaon da iti probinsya ti Abra sipud pay idi 2016-2018.
Inbatad na pay a dakkel ti nagbalin nga akem ti lokal a gobierno iti ili ti Sta. Maria ken Pilar, Abra tapno mapakdaaran dagiti umili ken ma-evacuate da nga insigida.
Inpetteng ni Albano nga agtultuloy ti monitoring ken combat operations da tapno maprotektaran dagiti umili ken saan da a makikadua iti makin-kanniggid a grupo.
Malaksid iti combat operations ket adda pay ti nabukel a Mobile Community Support Sustainment Team a panggep na a pagtalinaeden ti status ti tunggal barangay.
Ti gagem da nga agbalin nga insurgency free ti dagiti dadduma pay a rehiyon ket nakikoordinarda iti Technical Education Skills Development Authority ken iti Department of Labor and Emplyment tapno mangiwayat iti Enhanced Comprehensive Livelihood Integration Program para kadagiti dati nga rebelde nga nagsublin iti gobyerno.
Kabyataanna, binigbig pay ni Albano ti inpaay a suporta ti gobernadora ti probinsya ti La Union a Gov. Raffy Ortega – David no sadinno a mangisaysayangkat isuna ti Information Education Campaign kadagiti pagadalan tapno maisalakan dagiti agtutubo kadagiti aggandat a mangawis kadakuada.
