BACNOTAN, LA UNION — Naisayangkat idiay Bacnotan iti Regional Kick-Off ti Nationwide Simultaneous Conduct of School-Based Feeding Program ti Department of Education (DepEd) para iti School Year 2026–2027 idi Hulyo 8, 2026 nga addaan tema a “Creating a Future Where No Child Goes Hungry.”
Kabayatan ti programa, inbinglay ni Mayor Divine Fontanilla dagiti inisiatiba ti lokal a gobierno iti pananglaban iti bisin ken malnutrision.
Inpaganetget na met iti kinapateg ti umno a nutrision iti pananggun-od ti dekalidad nga edukasion gapu ta ad-adda nga agbalbalin a nakasagana ken makasuro dagiti agad-adal no umdas iti nutrision-da.
Nagyaman met ni Mayor Divine iti DepEd, iti panangidaulo ni Regional Director Estela P. Leon-Cariño, kasta met kadagiti partner agencies ken stakeholder, para iti agtultuloy a panagtinnulong iti panangilungalong ti nasalsalun-at ken nalawlawag a masakbayan para kadagiti agtutubo.
Nagrugian iti aktibidad kadagiti panagpabuya dagiti agad-adal, a sinaruno ti ribbon-cutting ceremony ken panagsarungkar iti Busog, Lusog, Talino (BLT) Kitchen and Training Center, a nakaisayangkatan ti feeding activity para kadagiti ubbing.
Nagbalin met a paset ti programa ti ceremonial milk toasting ken naggigiddan a national live broadcast ti School-Based Feeding Program ken milk feeding activity a naisayangkat iti nadumaduma a paset ti pagilian.
Ti aktibidad ket dinar-ayan dagiti opisial ti DepEd Central Office, Schools Division Offices, dagiti nangibagi ti nadumaduma a pagadalan iti Rehion 1, dagiti stakeholders, ken dagiti dadduma a kadua iti panangipatungpal dagiti programa pangsalun-at ken pang-edukasion.
Segun ti lokal a goberno, agtultuloy da nga ilungalong dagiti programa a mangitag-ay iti umno ken sapat a nutrision, dakalidad nga edukasion, ken napinpintas a masakbayan para iti tunggal ubing a Bacnotanean.###
