Nangisayangkat ti Philippine Coast Guard (PCG) ti rehabilitasyon kadagiti coral reefs sadiay Pag-asa Island ken Kalayaan Island Group.
Daitoy ket paset paylaeng iti agtultuloy nga inisyatiba ti gobierno a salaknian dagiti maritime environments idiay West Philippine Sea.
Segun iti PCG, tarigagay daitoy a misyon a pabiagen manen dagiti bahura a napateg ken dakkel iti importansya na para ti marine biodiversity iti rehiyon ken iti biag ti kabaybayan.
Indauloan ti PCG Marine Science Group ti nasao a misyon babaen ti pannakikoordinar ti Palawan Council for Sustainable Development and marine scientists manipud Western Philippines University – Puerto Princesa Campus.
Naiyusat iti aktibidad ti panangilasin kadagiti coral fragments, handling and replanting procedures, ken biodiversity assessments kasta met iti underwater surveys.
Ti rehabilitasyon kadagiti coral reefs ket maitunos met iti direktiba ni Presidente Ferdinand Marcos Jr. tapno masalakniban ken mapabiag iti matmatayen nga ecosystems idiay WPS.
Maipalagip nga inakusaran ti PCG ti pagilian a China ti panangibelleng kadagiti narumek ken natay a korales kadagiti sumagmamano a maritime features iti kabaybayan ken maseknan gapo iti posible a potensyal a reclamation activities manen iti garamugam a pagilian.
