BR LA UNION – Timpuar ti tensiyon iti sumagmamano nga eksena iti naragsak koma a sashing ceremony ti Miss Universe 2025 idiay Thailand idi Martes, Nobyembre 4, 2025.
Daytoy ket kalpasan a ngimmato ti boses ti head ti host country organizing committee a ni Nawat Itsaragrisil kontra iti kandidata ti Mexico a ni Fatima Bosch gapwanan ti panag-walkout na, a sinaruno met ti dadduma a kandidata manipud Latin America, Asia, ken Africa.
Maibasar iti report, maipagarop a nabagaan ni Miss Mexico kalpasan a pinagkedkedan na iti sponsor photo shoot ken immannugot laeng kadagiti aktibidad ti Telemundo.
Idi ipalawag na ti biang na, pinagpili ni Nawat nu agtalinaed wenno pumanaw, isunga nag-walkout ti Mexican beauty queen.
Simmuporta met kenkuana ni reigning Miss Universe Victoria Theilvig, a simmurot a pimmanaw .
Makita iti video a kimmiddaw ti tulong ni Nawat iti security ngem saan a nalapdan dagiti kandidata a rimuar.
Iti udi, naurnos met laeng ti Miss Universe Thailand ken MUO ti susik, ken natuloy met laeng ti sashing ceremony nga awan ni Nawat.
Ti insidente ket napasamak iti tengnga ti susik iti baetan ni MUO President Raul Rocha ken Nawat, nga akin-iggem ti Miss Universe Thailand franchise ken founder ti Miss Grand International.
Napasamak ti insidente, sumagmamano a lawas sakbay iti 74th Miss Universe coronation night inton Nobiyembre 21 idiay Impact Challenger Hall, Nonthaburi, Thailand.
