LA UNION – Kabayatan iti agtultuloy a panag-repack dagiti relief goods, agtultuloy met iti panagibunong iti ayuda para kadagiti residente iti naduma-duma a barangay ditoy syudad ti San Fernando, a kangrunaan nga apektado iti pannakaipasidong iti Modified Enhanced Community Quarantine (MECQ) gapwanan iti ngimmato a kaso ti sakit a COVID 19.
Mainaig ti daytoy, manamnama a maibunong ita nga aldaw ti Miyerkoles, Abril 14, iti relief goods para kadagiti residente ken boarders ti Barangay Ilocanos Sur, San Fernando, La Union.
Iti eksklusibo a pannakiuman ti Bombo Radyo kenni Barangay Secretary Marita Torres, kinuna na nga apaman a sumangpet iti dadduma a goods a karaman iti ayuda ket mai-repack a dagus ken maibunong metten kadagiti agnanaed iti nasao a barangay.
Iti maibunong a relief pack para iti maysa a resident family ket buklen iti kagudwa a kaban ti bagas (25 kls), maysa tray nga itlog, delata, mantika, nateng, ken sotanghon.
Segun kenni Torres, adda iti pakabuklan a 1,013 a family residents ken boarders iti mabunongan iti barangay da.
Manipud iti nasao a bilang, 909 dagiti family residents ken boarders bayat a 104 dagiti solo individual a residents ken boarders.
Adda itan iti maika-lima nga aldaw a nakapasidong iti MECQ iti syudad ti San Fernando
Maiyannurot pay laeng iti naipaulog nga Executive Order No. 66-2021, maipatpatungpal dagiti mas istrikto nga allagaden tapno maatipa iti panagwaras iti COVID 19.
Daytoy ket babaen iti tulong dagiti otoridad, frontliners, ken medical workers.
Base iti impormasyon, nangisayangkat dagiti kameng ti San Fernando City Police nga idaulwan ni PLTCOL Orly Pagaduan kas Acting Chief of Police, iti panag-patrolya iti igid ti baybay a masakopan ti syudad.
Nakailanad iti nasao nga EO a maipawil iti anyaman a panagu-ummong iti igid ti baybay nga agpaut agingga Mayo 2.
Ngem iti MECQ ket agpatingga inton Abril 23, agdama a tawen.
Nairanta ti nasao nga addang tapno labanan iti lalo a panagadu ti kaso ti COVID 19.
Napateg iti agtultuloy a panangsurot dagiti maipatpatungpal a health protocols, panagsuot ti face mask, face shield, social distancing, proper etiquette iti panaguyek ken panagbaeng, ken good hygiene.
