Nangipaay ti Provincial Government of La Union (PGLU) kadagiti essential relief goods ken emergency supplies iti ili ti Luna idi Hunio 15 kas paset ti nainget a panagsaganana kontra kadagiti didigra ken dadduma pay a kalamidad.
Indauluan ni Gobernador Mario Eduardo C. Ortega ken babaen ti Provincial Disaster Risk Reduction and Management Office (PDRRMO) iti naisayangkat a pannakaited dagiti food and non food items tapno masigurado nga adda umdas ken madagdagus a rekurso ti lokal a gobierno a mangipaay iti tulong no panawen ti emerhensia.
Karaman kadagiti naipatulod idiay Luna ket dagiti 155-litro a stackable storage boxes, Agkaysa Modular Tents, shelter-grade tarpaulins wenno 4×6-meter plastic covers, jerry cans a pagidulinan iti nadalus a danum, Department of Health Hygiene Kits, Family Kits manipud iti AHA Centre, bottled water, sabon, ken PAGCOR Food Packs.
Segun iti PGLU, estratehiko nga maidupin ken imanehar ti Lokal a Gobierno ti Luna dagiti nadakamat a suplay tapno masigurado ti napardas a pannakaiwaras ti tulong kadagiti pamilia a naapektaran iti aniaman a didigra wenno kalamidad.
Nagyaman met ni Mayor Gary N. Pinzon ken ti Luna Municipal Government kenni Governor Ortega kasta met ti PGLU iti agtultuloy a suportada iti pannakapapigsa ti kinasagana ken kinaandur dagiti komunidad ditoy probinsia.
Ipaganetget daytoy nga aramid ti kinapateg ti nasapa a panagsagana, nasayaat a koordinasion, ken umdas a reserba a suplay tapno masalakniban dagiti umili bayat ti didigra.
Maitunos pay daytoy iti pannakaitandudo ti Sustainable Development Goal (SDG) 11 wenno Sustainable Cities and Communities ken SDG 17 wenno Partnerships for the Goals, a mangitandudo kadagiti naandur a komunidad ken dakdakkel a panagtitinnulong dagiti institusion ti gobierno.
Babaen ti adbokasia ti “La Union: Agkaysa!”, agtultuloy nga itandudo ti probinsia ti panagkaykaysa ken panagsagana tapno masigurado nga agtalinaed a natalged, natibker, ken nakasagana dagiti komunidad iti sango ti aniaman a karit ken didigra. (Bombo Ericka Quinzon)
