Makapadanag para kenni Marikina Rep. Marcy Teodoro dagiti proyekto a natakuatan a nailatagan manen iti pondo babaen ti 2026 National Expenditure Program (NEP) nga uray pay dagitoy ket nalpasen.
Impaganetget ni Teodoro a dagiti proyekto a naipastrek ti NEP ket insagana dagiti ahensya wenno nagtaud mismo iti Department of Public Works and Highways ken saan a kadagiti kongresista.
Indasig ti mamanday-linteg ti slope protection sadiay Balanti Creek, Barangay Sto. Niño, a naileppasen idi pay tawen 2023 bayat nga adu pay dagiti napapateg a proyekto pang-imprastraktura nga agkurkurang ti pondo.
Kinunana nga adu latta a proyekto kadagiti nagduduma a lugar ti nasken nga iprayoridad ngem saan a nairaman ti singasing a pondo kas iti dadael ken lubak-lubak a paset ti JP Rizal idiay Marikina nga agturong idiay San Mateo, Rizal a napeggad para kadagiti biahero ken motorista.
Impaganetget ni Teodoro a nasken ket adda iti nainget a konsultasyon ken koordinasyon ti DPWH kadagiti lokal a gobierno tapno masiguro a dagiti proyekto ket maitunos iti master plan ken konektado kadagiti drainage system.
Innayon na pay a nu saan a maipatungpal ti kastoy ket masayang laeng dagiti pondo a naitukon kadagiti proyekto a maulit-ulit ken saan met a mapagnumnumaran dagiti umili.
