BR LA UNION – Saan a naliklikan ni Davao Rep. Paolo Duterte a mangipeksa ti pannakadismaya iti naipursige nga impeachment case kontra iti kabsat na a ni Vice President Sara Duterte idiay Kamara.
Segun iti mammanday linteg, makapungtot ken maaburido iti maipagarop a political motives dagiti nangilungalong ti panang-patakyas iti bise presidente.
Kinuna na a ti malisyoso a panangmanipula ti sumagmamano a mammanday linteg, tapno agkalap iti pirma ken ipursige iti daras a panang-aprubar ti awan basaran a kaso ti impeachment, a maysa a nalawag a kita ti political persecution.
Impaganetget na, a ti agdama nga administrasyon ket agar-aramid ti delikado nga addang.
Nu saan kunana a nakarikna dagitoy iti panag-rally ti nasurok maysa a milyon a taga-suporta ti Iglesia Ni Cristo, bulsek dagitoy ken mangar-aramid da ti dacdackel a problema .
Kinuna na a nu pagarupen ti administrasyon Marcos a maipursige iti inawaganna a “peke nga impeachment” nga awan ti pannusa ket nagbiddut kunana dagitoy.
Kinuna pay a saan laeng a maipapan datoy kenni VP Sara Duterte, ngem ketdi iti pagayatan dagiti umili a Pilipino.
Innayon pay ni Rep. Duterte a ti mapaspasamak ket awan annad panagabuso ti bileg ken awan ti nasayaat a pagtungpalanna.
