(Update) LA UNION – Kinumpirma ti pulisya a maibilang a ‘kidnap me’ scenario wennno fake kidnap iti naawatda a report maipapan iti pannakakidnap ti misis idiay Agoo, La Union ken iti kamaudiananna ket na-rescue idiay syudad ti Dagupan, Pangasinan.
Iti pannakiuman ti Bombo Radyo kenni Major Roy Villanueva, hepe ti Caba Police Station, kinunana a kalpasan a naisayangkat ti rescue operation iti naduma-duma a unit ti Philippine National Police (PNP) ket maipagarup nga inaklon ni Misis Adora Ramos, residente ti Sobredillo, Caba, La Union kadagiti kameng ti Anti-Kidnapping Group idiay Camp Crame nga imbentona laeng a daytoy ket nadukot.
Awan ti kinapudno nga isuna ket intaray ti kidnapper ken naiturong iti hotel idiay syudad ti Dagupan kasaruno iti panagkiddaw iti P5 million a rasom money para iti pannakaruk-at daytoy.
Nagbalin a nainot iti panag-istorya ni Major Villanueva maipapan iti detalye ti pasamak ngem nadakamat daytoy nga adda iti maipagarup a pakainaigan iti parikot ti pinansyal iti makagapu ti panangaramid ti misis iti ‘kidnap me’ scenario.
Kabayatanna, am-ammuen ita ti Bombo Radyo manipud iti PNP no adda iti sungsungbatan iti linteg ti misis iti maipagarup a panag-imbento daytoy iti istorya nga isuna ket na-kidnap.
