Saan nga ilaksid ni Akbayan Partylist Representative Perci Cendaña ti personal a panagraut kenkuana iti social media, nangruna kadagiti nang-drawing iti caricature mainaig iti kina-piwis na tapno uyawen ken ibabain.
Segun kenni Cendaña, lehitimo iti pammabalaw iti trabaho ti maysa nga opisyal iti gobierno, ngem adda iti pagpatinggaan iti kritisismo nu agtungpal daitoy iti personal a panagraut, harassment ken diskriminasyon.
Idi laeng kallabes ket nakaawat isuna kadagiti online posts a mangdakdakamat iti pisikal ken medikal a kondisyon na.
Impalagip iti mamanday-linteg a resulta iti stroke iti kondisyon na ket saan a rumbeng nga aramiden nga ang-angaw wenno ikkatan iti dignidad ti maysa a tao.
Nakikoordinar met isunan kadagiti abogado na tapno adalen dagiti posible a maipila a kaso kontra kadagiti responsable.
