Suportado ni Mamamayang Liberal (ML) Partylist Representative Leila de Lima ti panawagan para iti panangipila manen ti kabaroan nga Arbitral Case kontra ti pagilian a China gapo metten kadagiti agtultuloy nga harassments da kadagiti barko ken panangtagikua kadagiti teritoryo ti Pilipinas.
Daitoy nga addang ket kas protest iti interes ti pagilian kadagiti kabaybayan ken isla a sinakopen ti China ken agtultuloy a marikrikna ti panangabuso ken ilegal da a presenya.
Ti waragawag ni de Lima ket kasaruno ti kabaroan manen a panang-harass ti China kadagiti barko ti Pilipinas idiay West Philippine Sea a mangisaysayangkat laeng ti Kadiwa Mission para kadagiti mangngalap a Pilipino iti nasao a lugar.
Impaganetget ti mamanday-linteg a ti balligi ti Pilipinas iti Arbitral Ruling ket saan laeng a simple a dokumento nu di ket simbolo iti nasyonal a dignidad a nabigbig iti intero a lubong.
Kadwa iti West Philippine bloc idiay Kamara ket kiniddaw na iti pannakaipasa ti House Bill No. 1625 wenno West Philippine Sea Mandatory Education Act nu kasta ket mairaman ti saritaan maipanggep ti WPS kadagiti kurikulum ti elementarya ken high school; kasta met iti House Bill No. 1626 a mangidekdeklara iti Hulyo 12 kas National West Philippine Sea Victory Day.
Imbatad ni de Lima a ti panangdepensa ti WPS ket panangsalaknib kadagiti mangngalap ken ti soberanya ti Pilipinas.
