Nangipeksa ti nakaro a panakadismaya ni Davao City Representative Paolo Duterte babaen ti ababa a pannarita, kalpasan iti kontrobersial a panakadutok ni Justice Secretary Jesus Crispin “Boying” Remulla kas baro nga Ombudsman.
“It makes sense. Sa dami ng problema ng mga nakaupo ngayon, kailangan nila ng lahat ng tulong na makuha nila para mapagtakpan sila… even at the cost of making a mockery of our Constitution. God bless the Philippines,” segun kenni Rep. Duterte iti maysa a social media post.
Ti Ombudsman ket maysa nga independent constitutional office nga addaan ti pagrebbengan nga agimbestiga ken mangipila ti kaso kontra kadagiti opisyal ti gobierno a karaman ti korapsion.
Adda dagiti sumagmamano a grupo iti nangiwaragawag ti panagdanag iti posible a conflict of interest iti panagtakem ni Remulla a sigud a paset ti gabinete ti Presidente ken iti posisyon a rumbeng ket nawaya manipud iti impluwensia ti gobierno.
Ni Remulla ket nadutokan kas Ombudsman kalpasan iti panagretiro ni Samuel Martires a nagbalin nga sentro dagiti kontrobersia mainaig ti transparency ken access iti Statement of Assets, Liabilities, and Net Worth (SALN) dagiti opisyal.
Iti laksid dagiti pammabalaw, tinakderan ti Malacañang a legal ken maiyannatuo iti proseso ti appointment.
Kabayatanna, nagpanawagan ni Representative Duterte iti publiko nga agbalin a nasipot ken ilaban iti integridad dagiti institusion a rumbeng a mangilunglungalong ti accountability iti gobierno.###
