Sibubukel ti suporta ni House Committee Chair on Agriculture at Quezon Representative Mark Enverga ti pannakaipatungpal ti 60-day suspension para ti panag-angkat ti bigas ditoy Pilipinas.
Iti panagbetla ti mamanday-linteg ket kinunana a ti addang ni Presidente Ferdinand Marcos Jr. nga ipasardeng paylaeng iti temporario a rice importation ket umiso ken napanpanawen.
Innayon na pay a dakkel iti maitulong daitoy tapno maipaayan ti proteksyon dagiti lokal a mannalon ita a panawen ti panagaapit.
Segun iti Department of Agriculture, napunpunno ita dagiti bodega kadagiti naangkat a bigas isu nga awan iti espasyo a pangikabilan kadagiti baro nga apit.
Daitoy pay iti rason nu apay a bagsak iti presyo ti bigas kadagiti merkado a maysa met a dakkel a lugi para kadagiti lokal a mannalon.
Maiyannurot iti Republic Act No. 12078, temporario a sinuspindir ni Presidente Marcos ti importasyon ti produkto agrikultural gapo iti saan a balanse a kasasaad na kadagiti merkado.
Manamnama met nga agbalin a natibker ti presyo ti palay gapo iti suspensyon a mangipaay met ti gundaway kadagiti mannalon tapno makasubbot iti abak ken manayunan iti mabirukan da.
