Naiparikep ti maysa a restobar idiay ili iti San Juan, La Union gapu ti panaglabsing daytoy kadagiti pagannurutan mainaeg iti health protocols.
Maibasar iti panagkumpirma iti Bombo Radyo La Union ni Municipal Information and Tourism Officer Kiel Lanuzo, naduktalan ti panaglabsing na iti nasao a restobar iti naisayangkat a surprise inspection and monitoring ita a lawas.
Naobserbaran nga awan ti footh bath da, agdidikket a lamisaan iti uneg iti restobar, awan ti nakaikabil a divider wenno partition iti counter kas iti plastic cover wenno protective shield. Maysa pay a naglabsingda da ket panag-poperate nga awan iti certificate of authority to operate bussiness manipud iti Department of Tourism Region 1 ken LGU san juan.
Dagiti kapada nga establishimento a nakaimuntar kadagiti tourist spots ket immunan a naiwaragawag a kasapulan dagitoy ti agaplikar iti certificate of authority to operate sakbay nga agsubli dagitoy iti operasyon ita a Modefied Genaral Community Quarantine.
Innayon ni Lanuzo, kasapulan nga agtungpal dagitoy iti requirements. Agisumitirda iti letter of intent for the resumption of business no sadinno karaman kadagiti ikabil sadiay ti nagan dagiti empleyado ken designation dagitoy, medical certificates manipud iti Municipal Health Office ken photocopy iti business permit.
Gapu iti saan da a panagsurot iti pagannurutan ket temporaryo a naipasarado ti establishimento ngem naipaayan da iti gundaway tapno agcomply kadagiti requirements.
Inlawlawag ni Lanuzo a dagiti inikkan da iti certificate of authority to operate business iti nasao nga ili ket dagiti food establishments ken accomodation establishments.
Iti agdama, dumanon iti nasurok 30 nga establishimento ken tourist related establishments ti addanen iti certificate of authority to operate business sadiay.
Impanamama San Juan LGU iti nainget a panangtutokda kadagiti saan a sumursurot kadagiti pagannurutan nga establishimento iti masakupan dagitoy.
