Nakatuding nga isapubliko ita nga aldaw ti Korte Suprema iti resulta ti naisayangkat a ‘Bar Examinations’ idi napalabas a tawen 2025.
Maibasar iti pakaammo nga inruar ni Associate Justice Amy Lazaro-Javier, Chairperson ti 2025 Bar Examinations, mairuar iti listaan dagiti nakapasa inton malem.
Nangiruar met iti opisina ti Associate Justice dagiti sumagmamano a palagip ken guideline kadagiti aguray ti resulta ken listaan.
Agbalin a silulukat iti publiko iti ridaw ti Korte Suprema manipud alas-dyis ti bigat, ken adda dagiti LED walls wenno screens a maikabil iti courtyard ti Korte Suprema tapno ipakita iti listaan dagiti nakapasa ti bar exam, ngem agpaut laeng daytoy aginggana alas-sais ti rabii.
Nainget a maiparit a sumrek dagiti nakasuot ti footwear a makitkita iti ramay ken sakong ti saka, pang-ibaba a ‘ripped’ wenno ‘above the knee’, ken tops nga ‘sleeveless’, ‘cropped’ ken ‘see through’.
Maipatungpal met iti security inspection para kadagiti sumrek ken saan a mapalubusan iti panagikot ti paltog, arak, ken pampabettak.
Imbalakad ti Korte kadagiti amin nga examinees ken stakeholder nga iti laeng Supreme Court iti paggapuan ti lehitimo nga impormasion maipapan iti resulta ti Bar Exam.###
