LA UNION – Pormalen a naideklara a tumapog iti balubal ti politika dagiti agama nga isuda Retired General Tomas Dumpit Sr. ken Retired Col. Thomas “Butch” Dumpit Jr. para iti 2019 mid term election iti sidong ti PDP-Laban idiay probinsya ti La Union.
Iti naangay a panagtataripnong ken panagsapata dagiti baro a miyembro iti partido a dinar-ayan ni PDP-Laban Secretary General Willy Talag idiay ili ti Bauang, La Union, inwaragawag ni Dra. Joia Dumpit nga agkandidato kas kongresista iti maikaddua a distrito ti probinsya ni Ret. General Dumpit Sr.
Inyanunsyo met ni Talag iti tallaong a kumandidato para gobernador ti La Union ni Ret. Col. Dumpit Jr.
Dagiti agama a retirado nga opisyal iti militar ket siguden a nagbalin a kongresman iti maikaddua a distrito ti probinsya.
Kabayatanna, umabot met iti aganay 500 a nagsapata kas baro a miyembro ti PDP-Laban manipud iti maikaddua a distrito ti La Union iti sanguanan ken panangidaulo ni Talag. (Abs Flores)
