Nagpanawagan ni Roberto Claudio Sr., chairman ti Philippine Retailers Association (PRA) iti gobierno nga i-abolish ti “de minimis law” a mangilaslasin kadagiti imported goods nga aggatad ti P10K pababa manipud iti panagbayad ti buis ken dadduma pay a customs duties.
Kinuna ni Claudio kabayatan ti 31st National Retailer Conference and Expo a maluglugin dagiti physical stores gapo iti saan a patas a kumpetisyon kontra kadagiti online sellers, nangruna kadagiti orders a naggapo kadagiti e-commerce platforms a masansan ket manipud idiay China.
Innayon na pay a nu 90% ti e-commerce transactions idi tawen 2023 a dumanon ti aganay $39B ket saan a napaulogan ti value added tax, mapatta-patta a P100B ti napukaw a biruk iti gobierno.
Pinaregta ni Claudio ti Department of Finance (DOF) ken Department of Trade and Industry (DTI) a solusyunan i saan a nainkalintegan a kasasaad ti nagbaetan dagiti online ken physical retailers.
Malaksid iti panawagan nga ikkatenen ti “de minimis law,” panggep na pay a paamyendaran ti Internet Transactions Act (ITA), nga agdama ket saan a karaman ti physical goods iti masakopan na kasta met a nakapamaysa laeng iti streaming ken digital products.
Impaganetget ni Claudio a namaymayat nga addang iti panag-abolish ti “de minimis law” nu kasta ket maaddaan iti patas a kumpetisyon ti retail industry.
