LA UNION – Inaresto dagiti pulis ti maysa a retirado nga empleyado ti gobyerno a sumangsango iti kaso nga addaan ti pakainaigan ti kurapsyon idiay ili ti San Gabriel, La Union.
Nabigbig ti 73-anyos nga akusado a ni Rodolfo Daligues, residente ti Barangay Poblacio ti nasao nga ili.
Naammuan ti Bombo Radyo manipud ti San Gabriel Police Station, kadduada dagiti kameng ti Criminal Investigation and Detection Group (CIDG) idi a tiniliwda ni Daligues gapu ti warrant of arrest nga inyatnag ni 6th Division Sandiganbayan Chairperson Rodolfo Ponferrada ti Quezon City.
Sumangsango ti akusado iti panaglabsing ti Sec. 3 (e) ken Sec. 3 (g) ti Anti-Graft and Corrupt Practices Act wenno Republic Act 3019.
Dumanon met iti P30,000 ti piyansa nga intuding ti pangukuman para iti temporaryo a pannakaruka-at ti sigud nga empleyado ti gobyerno.
