LA UNION – Arestado ti maysa a retired US Navy idiay ili ti Bauang gapu iti panagpaputokna ken panagikutna iti awanan lisensia nga igam.
Binigbig ni PCI Joel Lagto, hepe ti Bauang Police Station, ti suspek a ni Ricardo Valdez, 58-anyos, awanan asawa, residente idiay Baguio city ngem addaan iti beach resort idiay Brgy. Baccuit Sur, Bauang.
Segun ken ni Lagto, nakaawatda iti reklamo kadagiti residente maipapan iti panagpaputok ni Valdez iti paltogna a maysa a cal. 9mm ken nalaus pay ti bartek daytoy.
Iti panagrespondeda, naamuan a ti saan a panagkinnaawatan iti girlfriend-na ti rason iti panagpagunggan ni Valdez.
Malaksid iti igam ket nasarakan pay iti rest house ti suspek dagiti live ammunitions para iti nasao nga igam.
Nakabalud itan ni Valdez ken nakasagana a maidatagan iti kaskenan a kaso.
