Pormalen a pinermaan ti Department of Education iti revised IRR ti Anti-Bullying Act of 2013 (RA 10627) nga addaan panggep a papigsaen pay iti kampanya ti departamento kontra iti bullying a kadawyan a mapaspasamak kadagiti pagadalan.
Inallukoy ti ahensiya dagiti biktima ti bullying a saan nga agdudua nga ipakaammo iti kapadasan da kadagiti maseknan.
Mapalpalubusan met iti anonymous reporting no kaspangarigan agkedked iti biktima nga agpabigbig.
Mabalin nga idulong kadagiti mannursuro, principal, Learner Formation Officer, wenno Disciplining Authority ti pagilian.
Kabayatanna, iti sidong ti Revised IRR ti Anti-Bullying Act, adda ti 30 nga aldaw iti pagadalan tapno imbestigaran ken resolbaen iti kaso.
Mabalin nga umapela iti biktima no saan daytoy nga umanamong iti resulta.
Kasapulan a maipatungpal daytoy kadagiti amin a pampubliko ken pribado a pagadalan, pakairamanan dagiti community learning centers.#
