Panggep nga iparepaso ni Senador Raffy Tulfo ti Rice Tariffication Law (RTL) agsipud kunana ta napaay ti linteg a tungpalen iti insapata na.
Inpaganetget ni Tulfo a marigrigatan itan ti dagiti mannalon a mangnamnama iti palay kas pagbiagan a kabaelan a makisabay iti nalaka nga imported rice. Iti agdama ket makiskissayan iti biruk da kasta met a dagiti lokal a mannalon ket maluglugi.
Maseknan iti senador nga agpegpeggad iti masakbayan ti industriya ti panagtalon ti palay gapo metten iti agdama a polisiya. Innayon na a kasapulan nga adalen a nalaing ti panangikkat ti quantitative restriction mainaig iti panagangkat ti bigas.
Kinunana a gapu’t awanen ti direkta a partisipasyon ti National Food Authority (NFA) iti panaggatang ti bigas, napukawan metten iti kompetisyon dagiti traders isu a nalaklaka dan nga ipababa dagiti farmgate prices ken makontrol iti presyo ti merkado.
Imbutaktak pay ni Tulfo ti inladawan na kas bulok a sistema dagiti sumagmamano a lokal nga opisyal maipapan ti panangiwaras ti abono, bin-i, rice credits, ken dadduma pay a klase ti tulong.
