LA UNION – Maur-uray laengen iti pannakaisapinal dagiti guidelines a masurot para kadagiti lokal a turista nga addaan ti plano nga agpasyar iti sadinuman a paset ti Region One ken idiay Baguio City.
Malaksid iti uniformed guidelines, maisap-sapinal pay iti online application form nga usaren ken sungbatan dagiti turista, sakbay dagitoy a mapalubosan nga agpasyar kadagiti tourist destinations idiay Ilocos Norte, Ilocos Sur, La Union, Pangasinan, agingga idiay syudad ti Baguio.
Kinuna iti Bombo Radyo La Union ni Provincial Information and Tourism Officer Adamor Dagang, posible nga inton katengngaan ti bulan ti Oktubre a mailukat ti “travel corridor” para kadagiti local tourist nga agtaud met laeng kadagiti nadakamat a lugar.
Naamwan nga idi Setyembre 22, naiyuswat iti “Ridge and Reef Baguio – Region 1 Travel Corridor” nga indaulwan mismo ni Tourism Secretary Bernadette Romulo Puyat idiay Baguio City.
Dinar-ayan pay daytoy dagiti local officials iti naduma-duma a probinsiya ti rehiyon a pakairamanan ni La Union Gov. Francisco Emmanuel Ortega III.
Daytoy ket senyales iti panangilukaten ti turismo iti Rehiyon Uno ken Baguio City kalpasan ti innem a bulan a panagrikep, gapwanan ti COVID 19 pandemic.
Kabayatanna, namnamaen a kabuyog iti pannakailukat ti turismo iti Ilocos Provinces, dagiti nairut nga allagaden a nasken a tungpalen dagiti turista, tapno malapdan iti panagwaras ti makapatay a virus.
Segun kenni Dagang, 50 pay laeng a turista iti palubusan da nga umuneg ditoy probinsiya.
