Nagpanawagan ni Bicol Saro Party-List Representative Terry Ridon a pagsungbaten ni Batangas 1st District Rep. Leandro Leviste gapu iti maipagarup a panagulbod ken panangiwaras kadagiti peke a damag a mainaig iti alegasion maibusor kenkuana maipapan ti budget insertions iti 2025 national budget.
Impaganetget ni Ridon a nalawag kadagiti transcript ti interview nga isuna iti intudo ni Leviste, isu a rumbeng isuna nga agsungbat ken ilinteg iti biddut a waragawag.
Inlawlawag met ni Leviste nga iti umuna a waragawagna ket para iti Bicol Saro Party-list ken saan a kenni Ridon kas indibidual.
Kinarit ni Leviste ni Ridon a siripen dagiti road projects nga agbalor ti P150 million idiay Camarines Sur, ken impanawagan ti Public Accounts Committee hearing tapno talantanen iti nasao a banag.
Innayonna pay a saan a rumbeng nga palubusan ti media a mailikaw iti isyu babaen ti panangibaga a party-list ken saan a personal iti pagsungbatan.
Mainaig iti posible a panangipila ti ethics complaint wenno kaso, kenuna ni Ridon a mabalin daytoy a mapasamak iti umno a panawen, ngem kasapulan pay nga agsungbat ken agpalawag ni Leviste kadagiti alegasionna gapu ta nakataya iti kredibilidad ti mammanday-linteg.
Iti sabali a bangir, pinagkedkedan ni Ridon iti panawagan nga agikkat isuna kas chair ti House Committee on Public Accounts, ken kenuna nga “out of the question” iti resignation nupay silulukat isuna iti recusal no kasapulan.
Kinarit met ni Ridon ni Leviste a paneknekan dagiti alegasionna ken lawlawagan iti autoridad na nga alaen dagiti dokumento manipud kenni sigud a DPWH undersecretary Maria Catalina Cabral a maipagarup a naglaon ti listaan dagiti proponent kadagiti maanomalya a flood control projects.#
