LA UNION – Inallukoy ti Commission on Election (COMELEC) dagiti information technology gaduates nga agipasa iti aplikasyon kadagiti lokal nga opisina ti ahensya tapno agserbi iti 2019 mid-term election.
Iti pannakiuman ti Bombo Radyo kenni Bauang, La Union Election Officer Gregorio Cabanban, kinunana a rinibo nga IT graduates iti kasapulanda tapno tumulong a mangiwanwan kadagiti Board of Election Inspectors nga ag-operate kadagiti maaramat a vote counting machines iti intero a pagilyan.
Napateg kinunana iti akem ti IT graduates kangrunaan iti teknikal nga aspeto tapno agballigi ti eleksyon.
Iti masakupanna laeng nga ili sigun kenni Cabanban ket agkasapulanda iti 35 IT graduates.
Iti kada IT graduate nga agserbi iti aldaw ti eleksyon ken makaawat ti P6,000 kas bayad iti serbisyo daytoy.
Maipasidong da pay ti panagsanay sakbay a tumapogda kadagiti naipabus-oy kadakuda a trabaho inton eleksyon.
