Inaprubaranen iti Research Institute for Tropical Medicine wenno RITM ti Ilocos Training Regional & Medical Center (ITRMC) ditoy syudad iti San Fernando, La Union, tapno agbalin a molecular laboratory wenno kas maysa a naananay a Covid 19 testing facility daytoy.
Daytoy ket kalpasan a naipasa iti itrmc dagiti kasapulan a dokumento tapno agbalin nga accredited testing facility ti nasao a pagagasan.
Maipalagip a dagiti specimen wenno dagiti swab test dagiti covid 19 patients ditoy probinsiya ket kasapulan pay idi a maipatulod idiay syudad iti baguio partikular iti baguio general hospital ken mauray iti mano nga aldaw sakbay a maamwan ti resulta, itattan ditoy ilocos region partikular iti probinsiya iti la union ket saan ton a kasapulan pay nga umadayo dagiti health authorities tapno agpatest iti specimen dagiti covid 19 patients.
Naamwan iti Bombo Radyo La Union kenni Dr. Rheuel Bobis, medical officer 4 iti DOH Region 1 kabayatan iti pannakiuman a ti ITRMC ti kaunaan a pagagasan ditoy ilocos region a naaprubaran tapno agbalin a covid 19 testing facility.
Innayon pay ni bobis a nakasaganan dagiti test kits ngem nauray pay laeng gamin daytoy accreditation iti nasao a pagagasan a simmampet tatta nga aldaw tapno naananay nga makaoperate da.
Ngem adda pay dagiti kasapulan nga urnosen iti nasao a pagagasan sakbay a naananay nga umawat daytoy kadagiti kliyente.
Inlawlawag pay ni bobis a dagiti umuna a matest iti covid 19 ket dagiti health workers, frontliners, suspected ken covid 19 patients maiyannurot iti maawawagan nga expanded covid 19 testing.
Awan pay ti impormasyon tayo no intono a mangrugi ti operasyon na daytoy agsipudta adda pay dagiti iplanplantsa da ngem ti probinsiya iti pangasinan met ti kaunaan ditoy ilocos region a nagisayangkat iti covid 19 testing da.
