Nagpanawagan ni Leyte 1st District Rep. ken sigud nga House Speaker Martin Romualdez, babaen kadagiti abogadona, iti Bureau of Immigration (BI) a mangisayangkat ti dagus nga imbestigasion ken mangipaulog ti palawag iti mapapati a biddut nga impormasion a maikonkonektar kenkuana iti plano a rumuar iti pagilian tapno lisian iti kaso a sangsanguenna.
Segun iti surat a naipatulod kenni Immigration Commissioner Joel Anthony Viado, saan a pudno dagiti report a ginandatna ti pimmanaw iti Pilipinas tapno maliklikan iti hurisdiksion ti Sandiganbayan.
Inpaganetget ti kampo ni Romualdez a dagiti reports ket saan a naberipikado, makadadael, ken mabalin a makaapektar iti pannakadengngeg ti kaso a nakasagana iti Sandiganbayan mainaig ti People of the Philippines v. Ferdinand Martin Gomez Romualdez (Case No. E-SB-26-PHDO-0002).
Impaganetget pay dagiti abogadona nga iti isyu ti travel restrictions ket adda pay laeng iti sakup ti korte ken saan a rumbeng nga agbalin a basaran dagiti pattapatta wenno saan a kumpirmado nga impormasion.
Segun iti kampo ti kongresista, dagiti statements a maibagbaga ti BI iti nangted ti biddut impresion iti publiko nga awanan ti basaran ken karbengan nakaibatayanna ken linabsingna ti kalinteganna a maipagarup nga inosente agingga a mapaneknekan a nakabasol.
Kinunada pay a dagiti kasta a report ti nangdadael iti reputasion ni Romualdez ken mabalin nga impluensiaan ti patas a pannakadengngeg ti kasona.
Kabayatanna, impapilit dagiti abogado ni Romualdez a saan a pulos a pinadas ti kliyenteda ti agsukir iti aniaman a bilin ti korte ken agtultuloy ti pannakitinnulongda kadagiti legal a proseso.
Immuna nga imbaga ti Bureau of Immigration idi Abril nga awan ti nairekordda a gandat ni Romualdez a pumanaw iti pagilian, bayat a pinasingkedanna pay nga adda iti immigration lookout bulletin order (ILBO),a saan nga automatiko a mangiparit iti panagbiahe no di ket agserbi a mekanismo a mangipakaammo kadagiti autoridad no agbiahe ti maysa a tao a maim-imbestigaran.###
