Opisialen a nalpas iti NBA career ni Russell Westbrook kalpasan nga inwaragawag na iti panagretiro daytoy kalpasan ti 18 seasons iti liga.
Impadamag ti 37-anyos a ni Westbrook iti panagretiro na babaen ti maysa a video iti social media nga insalaysay ti aktor a ni Michael B. Jordan. Nagleppas isuna kas all-time leader ti NBA iti 209 career triple-doubles, malaksid iti panagbalin na a nine-time All-Star ken 2017 Most Valuable Player.
Idi 2016-2017 MVP season, nag-average ni Westbrook ti 31.6 points, 10.7 rebounds ken 10.4 assists tunggal ay-ayam ken nakailista ti 42 triple-doubles, a nairekord idi para iti maysa a season.
Napili isuna kas fourth overall pick ti Seattle SuperSonics idi 2008 NBA Draft ken binusbos iti umuna nga 11 seasons ti karerana iti prangkisa a nagbalin nga Oklahoma City Thunder. Nagay-ayam met isuna para iti Houston Rockets, Washington Wizards, Los Angeles Lakers, Los Angeles Clippers, Denver Nuggets, ken Sacramento Kings.
Nagleppas ni Westbrook a maikalima iti all-time career assists ti NBA nga addaan ti 10,351 points ken maika-14 iti career scoring nga addaan ti 27,176 points.###
