Maysa a drone ti Russia ti nangdungpar iti apartment building idiay Romania, a kameng ti pagilian ti nabileg nga aliansa militar a North Atlantic Treaty Organization (NATO).
Segun iti Romanian General Inspectorate for Emergency Situations, bimtak ti intero nga eksplosibo a payload ti drone a nakaigapuan ti dakkel nga uram iti pasdek ken nakasugatan ti dua a tattao.
Maibasar iti report ti emergency services, naagasanen dagiti dua nga umili a nagsagaba iti pilat, idinto nga agarup 70 a tattao ti natalged a naibakwit bayat a naiddep ti uram.
Napasamak ti insidente itay Biernes, Mayo 29, iti daya a siudad ti Galati, a masarakan iti asideg ti beddeng ti Ukraine.
Dagus a kinondenar ti Foreign Ministry ti Romania ken inawagan daytoy a “nakaro ken natangsit a panagrang-ay manipud iti Russian Federation. Nupay saan a daytoy ti umuna a gundaway a nadungpar ti drone ti Russia iti teritorio ti maysa a kameng ti NATO bayat ti nasurok nga uppat a tawen a gubat idiay Ukraine, daytoy ti umuna a gundaway a nasugatan dagiti sibilian idiay Romania.”
Kalpasan ti insidente, dagus nga inayaban ni Romanian President Nicusor San ti emerhensia a miting ti Supreme Council of National Defense. Impatungpal ti konseho dagiti katupag a wagas kontra Russia epektibo itay bigat iti alas 11:00 ti bigat (local time) wenno alas 4:00 ti malem ditoy Pilipinas.
Indeklara met ti presidente ti Romania a naan-anay a sungsungbatan ti Russian Federation ti napasamak.
Sakbay ti panagbettak, nangibaon ti Romania iti dua nga F-16 fighter jets a mangpatrolia iti airspace-na kalpasan a naduktalanna ti iseserrek dagiti drone. Kiniddaw met ti pagilian kadagiti kaalyadona iti NATO ti kanayonan a kabaelan a kontra-drone.
Iti agdama, ti dasig ti Russia ket saan pay a nangiruar ti ania man a statement wenno komento maipapan iti pasamak, a kinondenar dagiti lider ti NATO ken Europeano a kas “lantaran ken nakaro a panaglabsing.”
