Namakdaar ni Russian President Vladimir Putin a maibilang nga ‘act of war’ no ikkaten ti North Atlantic Treaty Organization (NATO) ti restriksion iti panangusar ti Ukraine kadagiti long-range Western missiles a mangraut iti Russia.
Segun kenni Putin, kayatna a sawen a makigubgubat ti NATO a pakairamanan ti Estados Unidos ken dagiti pagilian ti Europa iti Russia.
No mapasamak daytoy, kinunana, mangaramid ti Moscow iti katupag a desision kas sungbat kadagiti pangta maibusor kadakuada.
Inaramid ti lider ti Russia ti statement kalpasan ti agparang a kinalukat dagiti kakadua ti Estados Unidos ken NATO iti posibilidad a palubosanda dagiti puersa ti Ukraine nga agusar kadagiti long-range weapons systems manipud iti West a mangraut kadagiti puntiria ti militar idiay Russia iti tengnga ti agtultuloy a gubat iti nagbaetan ti Russia ken Ukraine iti maikadua a tawenen.
