Kinuna ni Bukidnon 2nd District Rep. Jonathan Keith Flores a saan koma a lapped ti agdama a krisis ti enerhia tapno mapasardeng ti proseso ti impeachment kontra kenni Bise Presidente Sara Duterte.
Segun kenni Rep. Flores a Vice Chairperson ti House Committee on Justice, ibilin ti Konstitusion ti panagtungpal iti naituding nga impeachment timeline isu nga awan ti legal a pagbasaran da a mangisina. Impaganetgetna pay nga adda dagiti desision nga inaramid ti Korte Suprema maibusor iti Kamara mainaig iti panaglabsing kadagiti deadline dagiti kasta a kaso.
Impetteng ti mammanday-linteg a saan a maitantan ti hearing gapu laeng iti krisis. Kinunana, nalawag ti mandato ti Konstitusion a rumbeng a maitandudo daytoy.
Simmungbat met ni Flores kadagiti komento a rumbeng laeng nga ipamaysa ti Kongreso ti krisis ti enerhia a gapuanan ti tension iti Middle East. Segun kenkuana, ti Kamara ket addaan iti umdas a bilang dagiti lehislador tapno aggigiddan a mangaramid iti nadumaduma nga annongen.
Kadagiti nasurok a 300 a kameng ti Kamara, agarup 50 laeng ti kameng ti Committee on Justice nga agtataripnong maminsan iti makalawas para iti impeachment.
Inadmitir ni Flores a narigat ti kasasaadna ta ti pannakabagi manipud Mindanao, a napigsa ti suporta para iti pamilia Duterte. Nupay kasta, impapilitna a ti panagbalin a paset ti prosecution panel ket mandatory—saan a boluntario—basar iti takderna iti komite.
