Binabalaw ni Representative Leila de Lima iti saan a panagdar-ay ni Bise Presidente Sara Duterte iti panagdingeg ti House Committee on Justice mainaig ti sangsanguen daytoy nga impeachment process, a kunana ket maysa a “panangbastos” iti Konstitusyon ken mabalin nga ibilang a betrayal of public trust.
Segun kenni De Lima, makapadismaya iti arigna panangtagiawan ti Bise Presidente iti imbestigasion ti komite. Innayon na pay a no saan man a makadar-ay ni Duterte ket manamnama a mangipatulod iti kampo daytoy ti pormal a manipestasion kas panagraem iti proseso.
Inlawlawag met ti mammanday-linteg nga iti agdama nga addang ti Kamara ket saan pay a naan-anay a panagusig, no di ket kapada laeng ti maysa a preliminary investigation. Iti daytoy a lebel, agtaltalinaed iti karbengan ti respondent iti counsel, kasta met iti gundaway a sumango ken mangipaay dagiti clarificatory questions.
Tapno paneknekan ti waragawagna, dinakamat ni De Lima iti panagkita ni sigud a Supreme Court Justice Noel Tijam seknan iti obligasyon dagiti opisyal iti kastoy a klase ti imbestigasyon.
Maipalagip a manamnama a sumango ni Duterte tapno sungbatan dagiti alegasyon iti lebel ti komite, ngem ti panaglanganna ket nangigubuay ti tension iti panagdingeg. Para kenni De Lima, iti addang ket mangipakpakita ti kinaawan ti respeto iti pormal a proseso ti impeachment.###
