BR LA UNION – Pinaglibakan ni Senate President Sherwin Gatchalian a linapdan ni Senate impeachment court presiding officer Francis “Chiz” Escudero iti panagtestigo ni sigud a Senador Antonio Trillanes IV iti impeachment trial ni Vice President Sara Duterte.
Segun kenni Gatchalian, saan laeng a ni Escudero iti nagdesisyon nu mapatulodan ti subpoena ni Trillanes agsipudta naikonsulta nga immuna daytoy kadagiti senator-judge ti impeachment court.
Imbaga na nga adda iti sumagmamano a napapateg nga isyu iti impeachment trial nga immuna a natalantan ken ikon-konsulta ni Escudero kadagiti senator-judge sakbay a mangirwar ti desisyon wenno ruling.
Karaman ditoy iti isyu nu agbalin a testigo ni Trillanes, a kabilang kadagiti witness nga inraman ti prosecution iti manifestation para iti Article II wenno alegasyon ti unexplained wealth.
Immunan nga inwaragawag ni Trillanes idi Biyernes ti pannakadismaya na kenni Escudero agsipudta saan a naipaayan ti subpoena, ken imbaga na nga isuna laeng kadagiti testigo nga inraman ti prosecution para iti Article II ti saan a nakaawat ti nasao nga order.
Nupay kasta, imbaga ni Gatchalian a saan a kaipapanan daytoy a saanen a mabalin a tumestigo ni Trillanes gaputa awan ti subpoena manipud impeachment court.
Kinuna ti Senate President, a mabalin a paayaban ti prosecution panel ni Trillanes nu tarigagay da a mausar iti testimonya na tapno mapapigsa iti kaso.
Impaganetget pay ni Gatchalian a silulukat ti impeachment trial kadagiti testigo a kayat nga isango ti agsumbangir a benneg, maiyannurot iti proseso ti panagusig.
