Inlawlawag ti Department of Social Welfare and Development (DSWD) nga amin nga agmaymaysa mangpadpadakkel ti anak ket saan nga automatiko nga umawat ti benepisyo babaen ti Republic Act No. 11861 wenno Expanded Solo Parents Welfare Act.
Segun kenni Social Welfare Officer IV Jocelyn Vince Cruz, nasken a naan-anay iti responsibilidad ti aplikante iti panangaywan ken panangsuporta iti ubing ken awan ti co-parenting wenno regular a tulong manipud iti sigud nga asawa wenno kabagian.
Tinawen a mapabaro ti Solo Parent Identification Card (SPIC) ken maipasidon iti beripikasion ti LGU.
Maibasar iti datos ti ahensia, adda ti nasurok a 260,000 registered solo parents ditoy pagilian, bayat a 291 LGUs iti mangipapaay iti binulan a subsidio.
Karaman dagiti mabalin a mabigbig nga solo parents dagiti legal guardians, adoptive ken foster parents, ken sumagmamano a kabagian a nangarakup iti responsibilidad ti nagannak.
Saklawen met ti linteg dagiti dependents nga aginggana 22-anyos, awanan asawa, awanan ti trabaho, ken agad-adal.
Iringringpas metten ti DSWD ti unified ID system para kadagiti solo parents, a nairanta a maipatungpal iti intero a pagilian.###
