Impaganetget ni Palace Press Officer ken Presidential Communications Office Undersecretary Claire Castro a mabalin a paset ti maipagarup a destabilization plot kontra kenni Presidente Ferdinand Marcos Jr. dagiti alegasion a maibatbato kontra iti administrasion.
Segun kenni Castro, adda dagiti maipagarup a mangar-aramid dagiti istorya nga addaan panggep a dadaelen iti Presidente, ken ikonkonektar na iti nasao nga addang kadagiti sumagmamano a personalidad, kas ni sigud a Congressman Mike Defensor.
Kenuna met ni Castro nga agsarsarita isuna kas tagapagsarita ti Presidente ken saan a kas nangibagi dagiti indibidual a karaman kadagiti alegasion.
Nagpanawagan isuna iti publiko nga agbalin a nasirib kadagiti impormasion nga agwarwaras ken saan dagus a mamati kadagiti pammabasol nga awan ti umdas nga ebidensia na.
Kabayatanna, innaig met ti Palasyo iti saritaan iti kontrobersiya dagiti 18 a sigud a bodyguard ni sigud a Congressman Zaldy Co, a nabirngasan kas “Maleta Boys,” a nangpabasol ti maipagarup a panangitulod dagiti maleta ti kuarta kadagiti sumagmamano nga opisial ti gobierno.
Immunan nga imbaga ni Castro nga adda dagiti abot ken inconsistency kadagiti waragawag ti grupo ken impaganetget a saan daytoy a tumakder iti nainget a panagsukimat ti korte.
Nupay kasta, dagiti waragawag seknan iti maipagarup a destabilization plot ken pannakairaman dagiti personalidad ket agtaltalinaed nga alegasion ken agkasapulan ti naisina a beripikasion dagiti maseknan nga autoridad.
Naipadamag met a mamonmonitor ken ival-validate ti AFP intelligence community dagiti reports maipapan ti maipagarup a destabilization.###
