Mangrugi inton bigat, Lunes, Setiembre 14 iti panangidatag ti House prosecution panel ti ebidensia mainaig iti alegasion a saan a mailawlawag a kinabaknang ni Bise Presidente Sara Duterte iti impeachment trial.
Idauluan ni Bicol Saro Party-list Representative Terry Ridon ken Akbayan Party-list Representative Chel Diokno ti presentasion maipapan iti Article Two. Karaman kadagiti masukimat dagiti Statements of Assets, Liabilities ken Net Worth (SALNs) ni Duterte, kasta met dagiti rekord dagiti negosio ken kompaniana a naisilpo iti asawana a ni Manases “Mans” Carpio.
Nasurok nga 1,800 a pinansial a dokumento, agraman dagiti rekord ti banko ken insurance, iti naisagana kas ebidensia, bayat nga agingga iti 25 a testigo iti mabalin a maiparang, depende iti pammalubos ti depensa kadagiti sumagmamano nga stipulations.
Panggep ti prosekusion a paneknekan no adda dagiti saan a naideklara nga asset ken interes iti negosio, ken no maitunos dagitoy iti naideklara a kinabaknang ken lehitimo a pagtaudan ti birok ni Duterte.
Na-impeach isuna ti Kamara idi Mayo 11, 2026, iti botos a 257 a pimmabor, 25 a kimmontra, ken siam nga abstention.###
