LA UNION – Epektibo inton bigat, Abril a-10, maipasidong iti San Fernando City, La Union iti Modified Enhanced Community Quarantine (MECQ) agingga Abril 23, 2021.
Maiyannurot iti Executive Order No. 11, series 2021, a pinirmaan ni La Union Gov. Emmanuel ‘Pacoy’ Ortega III, nairut a maipatungpal dagiti quarantine measures a makatulong iti pananglapped ti panagwaras iti makaakar a sakit a COVID 19.
Iti tulong dagiti pulis ken dadduma pay a support units, maipatungpal iti mas nair-irut nga annuruten partikular iti panagruar dagiti tattao, panangimuntar iti checkpoints, panangsurot dagiti minimum health standards, panagrikep dagiti non-essential establishments, panangipatungpal ti curfew hours ken pannakai-deploy dagiti kanayunan a uniformed personnel.
Maipawil a rumuar dagiti tattao nga agtawen ti 18 agpababa ken 60-anyos agpangato.
Maipatungpal met ti curfew hour, manipud alas 11:00 ti rabii agingga alas 5:00 ti agsapa, malaksid kadagiti essential workers.
Iti agdama, nasurok a 250 dagiti active cases ti COVID-19 ditoy syudad kalpasan iti sumagmamano nga aldaw a pannakailista ti nangato a kaso ditoy.
Immunan a naipasidong iti 2-weeks MECQ dagiti lima nga ili ditoy La Union a pakaibilangan ti Aringay, Luna, Naguilian, Tubao ken Agoo, nangrugi idi Abril 8 agingga Abril 21.
